Siglir tar il cuntegn

Header

cuntegn

Exteriur 59 morts tar sajettim a Las Vegas

Tar il sajettim ad in concert a Las Vegas èn 59 persunas mortas e passa 520 vegnidas blessadas, fa a savair la polizia. In tregant, tenor la polizia in indigen, aveva cumenzà a sajettar durant in concert da country en la fulla dals visitaders. Tenor la polizia ha l'um sajettà giu sasez.

Da la stanza d'hotel en il 32avel plaun aveva l'um tratg cun in'arma automatica plirs 100 tuns en la fulla da glieud. Quella era ad in concert da country en rom dal «Route 91 Harvest festival» en vischinanza da la miglia da casinos.

59 persunas mortas – passa 520 blessadas

Actualmain discurra la polizia da 59 persunas mortas e passa 520 persunas blessadas. Sco che l'agentura da novitads tudestga DPA citescha pliras medias sajan stads passa 30'000 persunas al concert dal festival da musica. Quel saja fitg popular.

Il Stadi Islamic ha reclamà l'attatga per els

L'um haja tratg en la glieud enfin che la polizia è vegnida. Sco quai che la polizia communitgescha uss haja el mazzà sa sez. L'entschatta è vegnì communitgà che la polizia haja sajettà giu l'um. En si'infurmaziun a las medias ha il Sheriff da Las Vegas fatg a savair, ch'igl tregant era in um indigen. El n'haja betg gì colliaziuns tar gruppas extremistas. Entant ha dentant la millissa terroristica Stadi Islamic communitgà che l'um haja agì en lur num.

Via Twitter aveva la polizia avertì la populaziun d’evitar la via da casinos sco era la plazza aviatica e da betg publitgar videos u fotografias, che pudessan tradir las acziuns dals policists. A la plazza aviatica eran vegnids sviads plirs sgols.

Naginas controllas dad armas pli severas

La regenza na vul quai per il mument betg. I na saja betg il dretg mument per questa debatta, ha ditg la pledadra dal president Donald Trump. Il president sa concentreschia ussa sin las unfrendas.

Suenter la mazzacra da Las Vegas vulevan surtut ils democrats leschas davart las armas pli severas. En la campagna electorala era Trump cleramain cunter quai.

RR novitads 08:00+

Artitgels legids il pli savens