Trais terratrembels cun fermezzas tranter 6.5 e 6.8 sin la scala da Richter èn vegnids mesirads la notg da dumengia sin glindesdi en il vest da l’insla canadaisa Vancouver Island:
Ils epicenter passa 200 kilometers davent dal continent
Ils terratrembels èn succedids entaifer in’ura ora sut la mar en ina distanza da passa 197 enfin 223 kilometers en il vest dal continent en ina profunditad da 10 enfin 11 kilometers. Tenor il portal da medias canadais globalnews na dettia quai anc nagins rapports da donns ed i vegnian er betg spetgà tals. Medemamain na vegnia er betg fatg quint cun in tsunami.
Betg ils pli gronds terratrembels dal 2018 en la regiun
Er sch’ils terratrembels parian d'esser stads tranter ils gronds dals ultims onns a la costa dal vest dal continent nordamerican, haja quai dà anc pli gronds, scriva globalnews enavant. Pli grev quest onn haja tutgà in terratrembel da 7.9 la regiun 600 kilometers en il Sid da la chapitala dad Alasca, dad Anchorage.
Il pli grond en la regiun da British Columbia saja succedì il 1970 cun in terratrembel da 7.4.
British Columbia è sin il rintg da fieu dal Pacific
British Columbia cun la metropola Vancouver è la terz populada provinza canadaisa. L' insla Vancouver Island è situada davant la costa dal vest da la provinza – e quella è situada sin il rintg da fieu dal Pacific, la zona seismica la pli activa sin il mund. Onn per onn vegnissan mesirads millis da pitschens terratrembels.
RR novitads 09:00