Siglir tar il cuntegn
Inhalt

Exteriur 6 onns praschun per Pistorius

L'anteriur atlet sid-african Oscar Pistorius è vegnì sentenzià a 6 onns praschun. Quai ha annunzià la dretgira responsabla a Pretoria. Pistorius duai avair mazzà avant 3 onns sia amitga. El aveva sajettà pliras giadas sin ella. La procura publica aveva pretendì 15 onns praschun per Pistorius.

Oscar Pistorius arriva en la sala da dretgira.
Legenda: Oscar Pistorius (sanester) arriva en la sala da dretgira, curt avant la sentenzia. Keystone

Passa trais onns suenter ils sajets mortals sin sia amia è l'anteriur atlet d'elita da 29 onns vegni sentenzià a 6 onns praschun. La derschadra Thokozile Masipa ha decidì «che las circumstanzas mitigiantas paisan pli fitg ch'ils facturs grevants». Perquai vegnia en dumonda in chasti pli bass ch'il chasti minimal da 15 onns, uschia ha declerà la derschadra.

En l'emprima instanza (l'october 2014) è Pistorius vegnì sentenzià a 5 onns praschun pervi da mazzament per negligientscha. La procura publica aveva fatg recurs ed ha cuntanschì en la segunda instanza ina sentenzia pervi da mazzament.

Pistorius accepta

Oscar Pistorius na fa nagin recurs cunter la sentenzia. Quai han declerà ses defensurs.

Nus respectain la decisiun da la derschadra ed Oscar vegn a seser giu il chasti.
Autur: Andrew FacettAdvocat da Pistorius

Il di da son Valentin 2013 aveva Pistorius sajettà giu sia amia Reeva Steenkamp tras l'isch da tualetta serrà. Avant dretgira ha Pistorius sincerà ch'el haja manegià che la persuna davos l'isch saja in lader.

RR novitads 11:00