70 onns Hiroshima

Cun in appel a la pasch e da dischmetter tuttas armas atomaras è la citad giapunaisa Hiroshima sa regurdada da la bumba atomara ch'è vegnida bittada giu avant 70 onns. Las 8:15 temp local èn pliras dieschmilli persunas sa radunadas per ina minuta da silenzi.

in um giapunais avant in placat cun scrit «Never again» Bild in Lightbox öffnen.

Legenda da maletgs: Hiroshima sa regorda da las unfrendas d'avant 70 onns ed appellescha da dischmetter tuttas armas atomaras. Keystone

Gist da questas uras han ils Americans bittà giu il 1945 l'emprima bumba atomara ch'è vegnida en funcziun durant ina guerra. Tranter ils preschents a Hiroshima era il primminister giapiunais Shinzo Abe, l'ambassadura americana Caroline Kennedy sco era represchentants da radund 100 pajais.

Il burgamester da Hiroshima, Kazumi Matsui, ha pretendì en in appel che tuttas armas atomars duain vegnir dischmessas. Anc oz patteschian ils survivents fisica- e psichicamain vid las consequenzas da l'irradiaziun. Il primminister giapunais ha annunzià en ses pled ch'el veglia preschentar il settember a la radunanza plenara da l'ONU in nov sboz per ina resoluziun per dischmetter las armas atomaras.

70'000 persunas mortas sin in sfratg

Dals 350'000 abitants da la citad en il vest dal Giapun èn mortas avant 70 onns radund 70'000 persunas. Fin la fin da december da l'onn 1945 è il dumber s'augmentà sin il dubel. Trais dis suenter han ils Americans bittà giu la segunda bumba atomara sur Nagasaki. Fin il december èn mortas là ulteriuras 70'000 persunas. Curt suenter avair bittà giu las duas bumbas ha il Giapun capitulà. Anc oz moran carstgauns vid las consequenzas tardivas da l'irradiaziun atomara.

RR novitads 06:00