Siglir tar il cuntegn

Exteriur 716 milliardas per defensiun en USA

Il president american, Donald Trump ha suttascrit in nov budget per la defensiun da passa 716 milliardas dollars. La lescha porta il num dad in da ses pli gronds critichers – John McCain.

Purtret da Trump co el suttascriva in document.
Legenda: Trump ha suttascrit in nov budget per la defensiun da 716 milliardas dollars. Reuters

Tenor il president sa tracti da la pli impurtanta investiziun dal militar american aifer l'istorgia moderna dal pajais. Cun questa lescha ha Trump augmentà il budget da defensiun per la segunda giada aifer ses temp d'uffizi.

La nova lescha scumonda tranter auter er da furnir aviuns da cumbat a la Tirchia. Plinavant limitescha quella vinavant la collavuraziun cun la Russia.

Trump ha anc ina giada defendì ses plans per in'armada astronautica. Quella duaja daventar in ulteriur bratsch da l'armada americana. Sco il tschiel, la terra e la mar saja er l'univers numnadamain daventà in champ da battaglia, uschia il president.

RR novitads 06:00