Siglir tar il cuntegn
cuntegn

Exteriur 79 morts tar incendis da guaud en Grezia

Dals passa 172 blessads sajan pliras persunas anc en privel da vita.

Purtret d'ina dunna che tschertga ses chaun suenter ils incendis.
Legenda: En la regiun en l'ost da la Grezia sa chattan bleras chasas da vacanzas en ils guauds da pinias. Reuters

Curt e concis:

  • 79 persunas èn mortas pervi d'incendis da guaud en Grezia. Sulet en il lieu Rafina han las forzas d'agid chattà 26 morts. Quai rapportan gidanters da la Crusch cotschna.
  • Passa 172 persunas èn blessadas, 16 da quels sajan uffants ed 11 persunas sa chattan anc en privel da vita. Tozzels da persunas èn anc sparidas.
  • La gronda part dals fieus è sut controlla, sulet in furiescha anc adina.

Pertutgada il pli ferm è la regiun enturn la chapitala Athen. Là è vegnì clamà or il stadi d'urgenza. Al lieu vegn rapportà ch'il dumber d'unfrendas pudess anc crescher fermamain damai ch'ins chattia adina puspè novas unfrendas en l'ost dad Athen.

Il mender scenari

Anc avant era vegnì rapportà da 20 morts pervi dals incendis da guaud. «Quai è il scenari il mender pussaivel ch'è capità», ha ditg il schef da la protecziun civila grecca, Giannis Kapakis a la televisiun. Il fieu furieschia en ina regiun cuverta da guaud da pinias. Là dettia dapertut chasas da vacanzas. Blers abitants sajan fugids en panica e plirs champs da tendas cun uffants hajan stuì vegnir evacuads.

Blers fugids a la costa da la mar

Electricitad, telefons ed internet èn crudads or en intginas regiuns. Pervi dal fim ferm èn l'autostrada e la lingia da tren tranter Athen e Korinth serradas. La notg sin mardi han las autoritads cumenzà ad evacuar las regiuns a la costa tranter Mati e Rafina. Pervi dals fieus che vegnivan pli datiers sajan bleras persunas fugidas a la riva. Passa 700 persunas èn vegnidas spendradas cun agid da pestgaders, guardias da costa e turists cun bartgas da gumma. Els eran fugids a la riva per fugir da las flommas.

La gronda part dals fieus han ils pumpiers survegnì sut controlla durant la notg, quai suenter ch'il vent aveva chalà da buffar. Millis persunas han durmì ordavert, en autos u hallas da sport, rapporta la televisiun statala.

Schef da regenza en l'exteriur

Athen ha dumandà auters pajais da l'UE per agid en il cumbat cunter il fieu. Il schef da regenza, Alexis Tsipras ha terminà pli baud sia visita en Bosnia-Erzegovina, ed è turna ad Athen. «Mes patratgs èn tar ils carstgauns e las forzas d'agid», ha el ditg a la televisiun statala. El suppona ch'intschendraders pudessan avair mess aposta ils fieus.

Tsipras ha ordinà che pumpiers ed il militar duain sustegnair Athen. Plinavant haja il pajais dumandà l'Uniun Europeica per agid, ha declerà il pledader dals pumpiers.

Il mument regian en Grezia temperaturas da radund 40 grads. Plinavant hai dà en las regiuns pertutgadas in vent da la fermezza set. Incendis da guaud n'èn betg stgars durant la stad en Grezia. L'onn 2007 eran 77 persunas mortas pervi dals incendis da guaud.

RR novitads 06:00