Plinavant tema la regenza nepalaisa che passa 10’000 persunas sajan mortas. A Kathmandu sa concentreschan las lavurs da salvament anc adina sin las persunas sutterradas.
Il minister da l'intern ha concedì che la regenza haja difficultads da surmuntar la crisa.
Pervia da la tema da novs terratrembels han pliras 100’000 persunas passentà la notg or en il liber. Sco pliras agenturas da novitads scrivan, vegnia la vivonda e l’aua adina pli stgarsa.
Plirs millis bandunan Kathmandu
A la tschertga d’aua e vivonda han diesch millis da persunas bandunà la chapitala Kathmandu en il Nepal, uschia rapportan medias localas. I na dettia nagina electricitad ed era nagin’aua rapporta l’organisaziun per agid umanitar World Vision. Era veglian blers viagiar en ils vitgs nativs per mirar co i va cun la famiglia, ha ditg in represchentant.
Milliuns persunas pertutgadas da la catastrofa
Tut en tut èn radund 8 milliuns persunas pertutgadas da las consequenzas dal grev terratrembel. Sco quai che las Naziuns Unidas communitgeschan dovrian passa 1,4 milliuns mangiativas.
Nagin contact cun 33 Svizzers
Suenter il grev terratrembel en il Nepal na datti anc adina nagin contact cun 33 Svizzers. Quai ha ditg envers SRF l'ambassadur svizzer en il Nedal, Urs Herren. Cunquai che la rait mobila saja interrutta en bleras regiuns saja grev da prender si contact.
Er il provediment d'electricitad funcziunia be sporadicamain uschia ch'ils telefonins na pon betg vegnir chargiads si. Tenor indicaziuns dal departament federal per affars da l'exteriur èn 124 Svizzers annunziads en il Nepal.
Svizra mussa solidaritad
La populaziun svizra è entant sa mussada solidarica cun las unfrendas. Tenor la Chadaina da fortuna hajan ins enfin ussa rimnà 1,3 milliuns francs. Ils 5 da matg organisescha quella lura in di da solidaritad naziunal.
RR novitads 08:00
