In unfrenda saja in viagiatur dal Peru. Il viceprimminister ha ditg che l'attentader da suicidi saja era tranter ils morts. I saja in um da la Siria da 28 onns. Tenor Davutoglu vegn supponì ch'el saja commember da la milissa terroristica Stadi Islamic. Era 9 da las 15 persunas blessadas sajan Tudestgs.
Naginas unfrendas svizras
Duas da las persunas blessadas han grevas blessuras ha ditg Davutoglu. Il ministeri da l'exteriur da la Norvegia ha confermà ch'in burgais norvegiais saja vegnì blessà. Davart unfrendas svizras n'è enconuschent nagut. Il Departement federal per affars exteriurs ha communitgà ch'ins persequiteschia la chaussa.
L'attentat è capità en il center istoric dad Istanbul, en il quartier da la citad veglia Sultanahmet. Quel è datiers da la conuschenta Hagia Sophia e da la Moschea blaua che vegnan visitads stediamain da turists.
Il decurs dal di è gia sa mussà che turists da la Germania pudessen esser pertutgads. In represchentant d'in biro da viadi ha ditg a l'agentura da novitads Reuters, ch'ina gruppa da viadi tudestga era datiers da l'explosiun.
L'uffizi da l'exteriur tudestg cusseglia als Tudestgs ad Istanbul da guntgir pli grondas fulas da glieud, era sin plazzas publicas e sper las attracziuns turisticas. Il mument n'ha anc nagin surpiglia la responsabladad per l’attentat. Il minister dal intern da la Germania Thomas de Maiziüre ha annuzià da viagiar ad Istanbul.
RR novitads 11:00/14:00+