A l'eroport Gatwick a Londra sgolan ils emprims aviuns puspè, suenter ch'il traffic aviatic è stà interrut dapi mesemna saira pervi da dronas. Il mument possian intgins sgols partir da la pista, communitgescha l'eroport. Ils passaschiers stoppian però vinavant quintar cun retards e che sgols crodian or. Planisadas èn actualmain 700 partenzas dal segund grond eroport britannic.
Dapi mesemna saira ha l'eroport Gatwick stuì sviar aviuns – per part fin ad Amsterdam u Paris. La polizia tschertga vinavant las persunas ch’han laschà sgular dronas ed uschia procurà per il disturbi durant il temp da traffic da Nadal.
La mesemna saira eran stadas pertutgadas 10'000 persunas dals disturbis, la gievgia suenter lura silmain 120'000.
RR novitads 12:00
