A tgi tutga Mamma Teresa?

3 pajais dal Balcan recloman d'esser la patria da la nova sontga Mamma Teresa. Ella è vegnida declerada sontga la dumengia avantmezdi en ina ceremonia festiva da Papa Francestg.

Sursiglir cuntegn supplementar

Datas tar Mamma Teresa

Mamma Teresa en portrait.

Keystone

1910 naschientscha sco Gonxha Agnes Bojaxhiu a Skopje

1928 entrada en l’urden da las soras da Loreto

1929 noviza en India cun il num sora Teresa, suenter il vut Mamma Teresa

1950 fundaziun da ses urden da las missiunaras per la misericordia

1979 premi Nobel da la pasch

1997 Mamma Teresa mora

2003 beatificaziun

04-09-2016 canonisaziun

L'Albania è loscha da la canonisaziun da Mamma Teresa. Pitschna naziun - gronda sontga - ha scrit il minister da l'exteriur albanais sin facebook. L'Albania sa dispita entant dapi onns cun la Macedonia ed il Cosovo per Mamma Teresa.

Dispita per la sontga nova

Tuts trais pajais recloman d'esser la patria da Mamma Teresa. En la Macedonia saja ella naschida, creschida si però en l’Albania e la mamma da Mamma Teresa saja entant stada cosovara.

Ceremonia a Roma

Plirs 100’000 da pelegrins èn s'inscuntrads la dumengia sin la plazza da Son Pieder per a Roma. Els han festivà la canonisaziun da la mungia e purtadra dal premi nobel da la pasch.

Mama Teresa è vegnida enconuschenta sco «anghel dals paupers» entras ses engaschi en l'India. A Kalkota sa deditgava la sora albanaisa cun ses urden «Missiunaras da la misericordia» als povers e basegnus.

Canonisaziun en temp da record

La canonisaziun da Mama Teresa è ina da las pli spertas da l'istorgia da la baselgia catolica. Gia l'onn 2003 era ella vegnida beatifitgada ed ussa, 19 onns suenter sia mort, declerada sontga. Uschia sa ella vegnir onurada en la baselgia catolica en tut il mund sco sontga.

Critica vi da Mamma Teresa

Malgrà tut quai n’è Mamma Teresa betg nundispitaivla. Ses dubis vi da Dieu, ch’eran vegnids enconuschents suenter la mort da la sora, ma era las circumstanzas en sias chasas da tgira vegnan crititgads savens. Auters rinfatschan a Mamma Teresa da mo avair tractà ils sintoms da la povradad.

RR novitads 12:00

Emissiun tar quest artitgel