Siglir tar il cuntegn

Exteriur Accident da tren (I) - almain 27 morts e 50 blessads

Tar la disgrazia da tren il mardi datiers da la citad taliana Bari èn mortas almain 27 persunas. Passa 50 persunas èn vegnidas blessadas. Dus trens eran collidads frontalmain. L'acziun da salvament han cuntinuà durant la notg.

Ils dus trens collidads èn sa pluntads in en l'auter.
Legenda: Ils dus trens collidads èn sa pluntads in en l'auter. Keystone
In vrack da tren en il stgir. Persunas da salvament sin il lieu.
Legenda: Las acziuns da salvament han cuntinuà durant la notg. Keystone

Ils dus trens èn collidads ier en il nord da la citad sidtaliana Bari. Dapi lura lavuran las forzas da salvament sin il lieu da la disgrazia.

Almain 27 persunas moran, passa 50 èn blessadas ed autras anc serradas en en ils vracs

Enfin uss discurran las autoritads dad almain 27 persunas mortas. Passa 50 persunas èn vegnidas blessadas, cunzunt da quellas che sesivan en ils emprims dus vaguns dals trens. Quantas ch'èn anc serradas en tranter ils vaguns destruids n'è anc betg cler. A bord erian cunzunt pendularis e students da l'universitad.

Il vrac d'in vagun da tren da colur mellna.
Legenda: Devastaziun totala: Ils chars il pli davant èn demolids, be vracs èn restads. Keystone

Motiv per l'accident anc betg enconuschent

Sche la disgrazia è capitada pervi dad in defect tecnic u per sbagl uman n'è anc betg enconuschent. Il primminister talian Matteo Renzi ha empermess che la disgrazia vegnia sclerida cumplettamain.

Sin maletgs da televisiun èsi da vesair co ils dus trens en cumplettamain encugnads in en l’auter. Intgins vaguns èn destruids totalmain.

L'accident è capità sin il traject tranter Corato e Andria nua ch'i dat be in sulet binari.

RR novitads 14:00 / 15:00 / 20:00 / 23:00 / 06:00