Siglir tar il cuntegn

Header

cuntegn

Actura e chantadura Olivia Newton-John morta cun 73 onns

La chantadura ed actura saja morta en pasch en il ravugl da sia famiglia en il sid da la California, ha scrit ses um en in post sin Instagram. L'activista per cancer dal sain era vegnida enconuschenta cun sia rolla en il musical «Grease», la fin dals onns 1970.

Olivia Newton-John ha cumbattì dapi decennis encunter cancer. Ella saja stada passa 30 onns in simbol per speranza, durant tut quels onns ha ella cumbattì la malsogna e quai publicamain.

Enconuschenta sco Sandy da «Grease»

Passa 40 onns èsi enavos ch'ella ha fatg furora en il musical da «Grease». Il 1978 ha ella intgantà il public sco Sandy ed ha er fatg perder il chau il giuven John Travolta en sia rolla da Danny – cun sia frisura cun chavels nairs e las cotlettas.

Gia trais onns avant era Newton-John dentant daventada in star, sco chantadura. Gia cun 15 onns ha ella fundà sia emprima band da mattas. Il 1966 ha ella registrà ses emprim album. Cun chanzuns sco «Let Me Be There», il 1974, è ella vegnida enconuschenta l'emprima giada en ils Stadis Unids. Suenter ha ella cuntinuà cun «On The Banks Of Ohio», «If You Love Me Let Me Know» e «Have You Never Been Mellow». Il 1981 ha ella publitgà ses album il pli enconuschent «Physical».

Sia figlia ha gì gist sis onns cura che Newton-John ha survegnì il 1992 la diagnosa da cancer dal sain. Ella ha lura stuì dar giu turneas ed è ida a star da California en l'Australia. La letg cun ses emprim um, il sautunz Matt Lattanzi è lura ida empaglia il 1995. 2008 ha ella maridà John Easterling. Durant sia vita è ella s'engaschada fermamain per legalisar il cannabis medicinal.

Or da l'archiv

La scola da musica ha producì a Vella cun lur scolaras e scolars il musical da Grease.

video
Grease en Surselva
Or da Telesguard dals 22.04.2013.
laschar ir. Durada: 3 minutas 10 Secundas.

RTR novitads 23:00

Artitgels legids il pli savens

Scrollar a sanestra Scrollar a dretga