Il proceder ed il secuntegnair dal suspectà mussian il mument sin in context dal SI, ha ditg il president da l'uffizi criminal da Sachsen. L'um da 22 onns haja lavurà vid ina chargia explosiva, probabel en furma d'in gilet cun material explosiv.
Il Sirian da 22 onns era vegnì arrestà la notg passada en la citad da Leipzig. Quai ha la polizia communitgà sur il servetsch da novitads curtas Twitter. L'um suspectà saja dapi il 2015 en Germania ed haja dapi intgins mais il status da fugitiv.
La sonda aveva la polizia tudestga chattà plirs tschients grams material fitg explosiv en in'abitaziun a Chemnitz. L'um da 22 onns era dentant mitschà. Pli tard aveva la polizia arrestà en tut quatter persunas ch'èn stadas en contact cun l'um.
In ulteriur suspectà er en arrest
Ina da quellas persunas saja tenor il pledader da la Polizia da Sachsen in da trais enconuschents dal suspectà principal. El saja vegnì arrestà da la polizia. Ils dus auters umens sajan danovamain en libertad.
L’abitaziun en la citad saxona era vegnida intercurida durant in’acziun gronda da la polizia in sonda a bun'ura. In quartier entir era vegnì isolà e per part era evacuà. La polizia aveva suspectà ch’i vegnia planisada in’attatga cun bumbas.
Procura publica investighescha
La procura publica tudestga a Karlsruhe surpiglia las investigaziuns en il cas dal material explosiv da Chemnitz. Surtut la quantitad dal material chattà saja in indizi per in’attatga planisada, ha ditg ina pledadra da la procura publica. I vegnia suspectà ch’in act violent, in act privlus per la segirtad dal pajais era planisà, hai gì num vinavant.
RR novitads 16:00++