Siglir tar il cuntegn

Header

cuntegn

Exteriur Ad Aleppo regia la fom

En vista a la situaziun en ils quartiers bloccads da la citad Aleppo, fa l’ONU in appel dramatic a las partidas da guerra en la Siria.

Las reservas da mangiativas sajan prest duvradas si, actualmain repartian els las davosas raziuns. Quai ha declerà il coordinatur d’agid da las Naziuns Unidas per la Siria, Jan Egeland. Radund 250’000 persunas pateschian fom.

Nairas uras per gidar Aleppo

En vista a l’enviern cun ses fraid che stettia avant porta stoppian tut ils involvids finalmain pussibilitar in access umanitar, ha ditg Egeland. El saja plain fidanza che quai schabegia. L’ONU dovria la lubientscha da purtar medicaments e mangiativas ad Aleppo. Plinavant stoppian medis e tgirunzas cuntanscher la citad, ed il transport da blessads ord la citad stoppia esser pussaivel.

Ina regiun cumbattida dapi mais

Dapi il fanadur èn parts da la citad d'Aleppo che vegnan controllads da rebels circumdads da truppas da la regenza siriana. Il territori vegn adina puspè bumbardà d’aviuns sirians e russ. Omaduas partidas da cumbat impedeschan garanzias da segirezza uschia che l’ONU pudess vegnir activa.

RR novitads 17:00

Artitgels legids il pli savens