Siglir tar il cuntegn

Header

cuntegn

Exteriur Admoniziuns severas a la Corea dal Nord

Anc in favrer vul la Corea dal Nord manar in satellit en il spazi e far al medem mument in test per ina racheta gronda. Il Giapun discurra dad ina provocaziun e smanatscha, da sajettar giu la racheta. Era la China e la Corea dal Sid averteschan Pjöngjang.

L’annunzia nord-coreana, da trametter il satellit en il spazi, ha alarmà ils vischins da la Nord Corea. Quai che la Corea dal Nord annunzia sco start da satellit, vegn analisà sin livel internaziunal sco test zuppà dad ina racheta a lunga distanza.

"In act da provocaziun greva" di il Giappun

Il prim-minister giapunais Shinzo Abe ha ditg ch'in start na fissi betg mo in cler surpassament da las resoluziuns da l'ONU, mabain er “in act da provocaziun greva” envers il Giapun. Il conservativ da dretga pretenda da la Corea dal Nord, da dar si ils plans cun la racheta spaziala. Per cas che la racheta da Pjöngjang smanatschia il territori giapunais, haja cumandà il minister da defaisa giapunais, Gen Nakatani, al militar, da sajettar giu ella.

Er la Corea dal Sid ha smanatschà cun consequenzas seriusas, senza dentant vegnir pli concreta.

Preoccupaziun era tar la China, alliada da la Corea dal Nord

Era la China ed ils Stadis Unids sa mussan preoccupads pervi dal start da racheta annunzià.

La cuminanza internaziunala duai trametter “in messadi svelt e clar”, di il pledader dal ministeri da l’extern american, John Kirby. Las sancziuns, ch’il cussegl da segirezza da las Naziuns Unidas ONU haja decis, na possian vegnir surpassadas, di Kirby.

La China pretenda da la Corea dal Nord, dad esser prudenta e da far nagut, che pudess laschar escalar vinavant la situaziun sin la peninsla coreana. La China è in dals pacs alliats da la Corea dal Nord.

RR Novitads 11:00

Artitgels legids il pli savens