Siglir tar il cuntegn
cuntegn

Exteriur Affera Benalla: Minister da l'intern refusa renfatschas

Gérard Collomb ha tenor atgnas indicaziuns savì gia baud da las renfatschas da violenza cunter Alexandre Benalla, l'anteriur collavuratur da segirezza dal president Emmanuel Macron. Collomb refusa dentant d'avair zuppentà insatge.

Purtret da Gérard Collomb.
Legenda: Il minister da l'intern Gérard Collomb ha gì in'audiziun davant l'assamblea naziunala. Keystone

Cura che Gérard Collomb haja udì ils dus da matg da l'acziun da Benalla, haja il biro dad Emmanuel Macron vulì chastiar il collavuratur Benalla. Collomb saja vegnì infurmà da ses secretari ch'il president saja infurmà davart il video cumparì. Perquai na saja el betg sa fatschentà pli fitg da la chaussa. Quai ha Collomb ditg davant in gremi d'investigaziun da l'assamblea naziunala da la Frantscha. El saja vegnì a la conclusiun che la chaussa saja vegnida examinada a moda adequata.

L'affera Benalla

L'anteriur collavuratur da segirezza dal president, Alexandre Benalla saja stà violent envers in demonstrant il prim da matg. El haja purtà ina chapellina da polizia ed era ina faschetta da polizia malgrà ch'el na saja betg stà en funcziun.

Las reproschas èn vegnidas enconuschentas a la publicitad pir il fanadur, entras rapports da medias. L'opposiziun suppona in scandal da zuppentar. L'affera tutga tar ina da las pli grondas crisas durant il temp d'uffizi da Macron. Quel n'è anc betg s'exprimì.

Cunter Benalla è entant vegnida averta ina procedura penala. A l'um da 26 onns vegn renfatschà violenza, e ch'el haja fatg maldiever da sia funcziun publica. L'audiziun da Collomb duai sclerir, a partir da cura che la regenza ha savì tge.

RR novitads 12:00