En l'Afganistan han ils Taliban regents arrestà 18 collavuraturs da l'organisaziun nunguvernamentala svizra «International assistance mission». L'organisaziun d'agid cristiana che ha la sedia a Genevra ha infurmà.
I sa tractia da 17 Afgans ed afganas ed ina persuna da l'exteriur. Daco che las autoritads dals Taliban han arrestà els n'è betg cler, ils Taliban n'han betg prendì posiziun. L'organisaziun «International assistance mission» è dapi passa 50 onns activa en l'Afganistan surtut en ils secturs da sanadad e furmaziun.