Afghanistan - ils taliban han in nov schef

4 dis suenter la mort da lur schef Mullah Achtar Mansur tras dronas americanas han ils taliban numnà cun Mullah Haibatullah Achundsada in nov schef.

In portrait dad el. Bild in Lightbox öffnen.

Legenda da maletgs: Il nov schef dals taliban - in portrait da Mullah Haibatullah Achundsada senza data ch'è vegnì publitgà tar sia nominaziun. Keystone

Sco ch’ils islamists radicals communitgeschan sez, s’è decidì il cussegl suprem, la Schura, unanimamain per il nov manader.

Il nov schef n'è betg sta cumbattant

Mullah Haibatullah Achundsada è in manader religius renconuschì ed in derschader d'aut rang. Fin ussa n'ha el gì nagina rolla sin il champ da battaglia. Quai è insolit per ils taliban. El ha dentant dus suppleants: a Siradschuddin Hakkani, ch’era gia suppleant dal manader mazzà, ed a Mullah Jakub, il figl dal fundader dals taliban, Mullah Omar.

Antecessur mort tras drona americana

L’antecessur Mullah Achtar Mansur era vegnì mazzà avant 4 dis tras in attatga da dronas americana en il Pakistan. Quai pervi ch’il Pentagon haja gi mussaments che Mansur era per exequir acts violents «directamain» encunter las truppas dals Stadis Unids e ses partenaris.

Obama cloma ad ina participaziun a discurs da pasch

La mort da Mansur saja tenor il president american Barack Obama in term impurtant sin la via da l’Afghanistan a la pasch. Ussa sa duajan participar ils schefs dals taliban a discurs da pasch. Quai saja l’unica via reala per surventscher il conflict.

RR novitads 10:00