-
Bild 1 von 3. Vista generala sin Asad Khel en la provinza da Nangarhar, nua che l’armada americana ha bittà giu sia bumba. Bildquelle: Keystone.
-
Bild 2 von 3. Persunas civilas ed animals tar la vischnanca da Pandola en vischinanza dal lieu bumbardà da l’armada americana. Bildquelle: Keystone.
-
Bild 3 von 3. In uffizial da segirtad fa guardia en vischinanza dal lieu, nua che la bumba gronda è detunada. Bildquelle: Keystone.
Tenor il guvernatur en la provinza pertutgada da Nagarhar en l’ost da l’Afghanistan haja la bumba mazzà 92 cumbattants dal Stadi Islamic SI. In auter uffizial discurra da 90 dschihadists mazzads. Cun quai è la cifra trais giadas uschè gronda sco annunzià curt suenter l’attatga.
I n'haja betg dà unfrendas civilas
Malgrà che la milissa dal SI haja endrizzà ses zops tar chasas civilas da la populaziun afghana, n'haja tenor las funtaunas uffizialas betg dà unfrendas civilas. L’armada americana aveva bumbardà la gievgia passada in sistem da zops e tunnels dal SI. Tenor il ministeri da defensiun afghan sajan vegnids destruids tar l’attatga tant zops ‘strategics’ dals islamists sco er in sistem da tunnel profund sut la terra.
Emprim diever da la megabumba...
Grond’attenziun aveva chaschunà il tip da bumba duvrà per quell’acziun. La GBU-43/B Massive Ordnance Air Blast (Moab) è la pli gronda bumba betg nucleara en l’arsenal american ed ha in pais da radund 10 tonnas. Ella è vegnida duvrada per l’emprima giada en in’attatga militara.
... vegn crititgà da Hamid Karsai
L’anteriur schef da stadi afghan Hamid Karsai ha condemnà l’attatga. Ses pajais vegni duvrà sco territori da test per novas armas, ha el crititgà sin Twitter.
La fin d’emna passada era in schuldà american mort en in’ operaziun cunter il SI en la provinza da Nangarhar.
RR novitads 09:00