Dals terratrembels desastrus en l’Afganistan èn per gronda part dunnas ed uffants morts. Lur cumpart vi da las unfrendas registradas fin uss muntia a 90% ha communitgà UNICEF, l’Ovra d’agid per uffants da las Naziuns Unidas. Dunnas ed uffants sajan savens a chasa e fetschian il perchasa e guardian dals pitschens. Perquai sajan els er periclitadas il pli fitg sche bajetgs dettian ensemen. Tenor indicaziuns uffizialas èn radund 2’500 persunas mortas dals terratrembels en il vest dal pajais. Passa duamilli ulteriuras sajan vegnidas blessadas.
Ina seria da terratrembels
Plirs terratrembel han scurlattà il nordvest da l'Afganistan. Il davos ha gì l'epicenter 33 kilometers en il nordvest da la citad principala da la provinza Sindadschan, Herat. Il terratrembel haja gì ina fermezza da 4,9 scriva l'observatori da terratrembels dals Stadis Unids. Ulteriurs terratrembels han gì ina fermezza da tranter 4,7 e 6,3. Blers territoris en l'Afghanistan na pon ins betg pli cuntanscher sin via.
La regiun pertutgada è al cunfin da l'Afghanistan cun l'Iran. En questa regiun nua che la platta araba, indica ed eurasia fruntan ina sin l'autra datti adina puspè terratrembels. Ils emprims terratrembels han gì ina fermezza da tranter 4,7 e 6,3. Pir il 2022 aveva in terratrembel chaschunà bleras unfrendas en l'Afghanistan.