Il parlament naziunal en l'Africa dal Sid brischa. Maletgs da televisiun mussan flommas e ferm fim sur il bajetg a la Citad dal Cap. Tenor l'agentura da novitads AFP è il fieu rut ora la notg. Dapi la damaun marvegl cumbattan passa 60 pumpiers las flommas a la part davos dal cumplex d'edifizis dal parlament, nua che la chombra d'assamblea veglia ed il cussegl naziunal da las provinzas fan lur sessiuns, rapporta l'emettur statal SABC.
Entant saja il tetg dad in dals bajetgs sballunà, ed i saja da vesair sfessas en pliras paraids.
I na saja bain anc betg cler, sche persunas sajan anc en il bajetg, ha ditg Jean-Pierre Smith da l'unitad per segirtad da la citad. Ins quintia però che naginas persunas sajan vegnidas blessadas.
La raschun per l'incendi n'è betg anc clera.
La Citad dal Cap ha gia subì l'avrigl passà in fieu devastant. Quel aveva destruì tranter auter impurtants documents da la biblioteca universitara.