La Federaziun internaziunala per l’atletica leva (IAAF) prolunghescha la suspensiun da la federaziun russa. Questa decisiun ha la IAAF annunzià ad ina conferenza da medias a Vienna. Uschia pon atlets russ probablamain betg sa participar al campiunadi europeic ad Amsterdam ed als gieus olimpics a Rio de Janeiro.
Atlets ch’èn cumprovadamain schubers duain però pudair sa participar per ina candidatura singula, eventualmain sut la bandiera olimpica. Davart quest cumpromiss vulan la IAAF ed il Comité olimpic internaziunal decider mardi proxim a Losanna.
Putin dementescha doping statal
Gia avant la decisiun da la IAAF era il president da la Russia s’exprimì: «L’entir team na po betg esser responsabel per in singul che cuntrafa a las reglas», ha ditg il schef dal Kreml.
Ultra da quai ha Putin danovamain refusà renfatschas pertutgant dopings sistematics ed organisads da posts statals en ses pajais: «I na dat nagin sustegn da la regenza per violaziuns da reglas dal sport, cunzunt betg davart la dumonda dal doping, ed i na po er dar nagin.»
RR novitads 09:00