Siglir tar il cuntegn

Header

cuntegn

Exteriur Al-Baschir ha para bandunà il pajais

Il president sudanais Omar Hassan al-Baschir ha para bandunà l'Africa dal sid. Quai ha declerà il ministeri statal sudanais. L'Africa dal sid n'è anc betg s'exprimida en chaussa.

Sin decret d'in derschader a Pretoria, stuess l'Africa dal sid impedir che al-Baschir possia bandunar il stadi. Quai sin basa d'in cumond d'arrest da la Curt penala internaziunala a Den Haag.

Al-Baschir vegn numnadamain tschertgà da la Curt penala internaziunala a Den Haag pervi da suspect da genocid. El è viagià a Johannesburg per sa participar ad in inscunter dals schefs da stadi e regenza da l'Uniun Africana.

UE ed USA fan squitsch

La curt penala a Den Haag ha decretà dus cumonds d'arrest internaziunals pervi dal suspect da genucid, crims da guerra e crims cunter l'umanitad en la provinza Darfur. Il conflict en questa provinza ha dapi il 2004 gia custà la vita a 300'000 persunas, quai tenor calculaziuns da l'ONU. Passa 2,5 milliuns persunas èn fugidas ord la regiun.

L'incumbensada per l'exteriur da l'UE, Federica Mogherini, ha fatg a savair che l'Africa dal sid haja d'ademplir il cumond d'arrest. Era il ministeri da l'exteriur american è s'exprimi uschia.

RR novitads 11:00/16:00

Artitgels legids il pli savens