Curt e concis:
- il terratrembel ha chaschunà almain 14 morts e da quai da 160 blessads
- numerusas chasas èn vegnidas donnegiadas u destruidas
I saja però da temair ch'il dumber da las unfrendas creschia, uschia las autoritads. I saja stà in fitg ferm terratrembel, ha ditg il guvernatur Zainul Majdi.
Tenor l'observatori da terratrembels american ha la terra scurlattà en ina profunditad da 24 kilometers, quai datiers da la citad principala Mataram.
Plirs tozzels chasas sajan vegnidas destruidas cumplettamain. Las forzas da salvament sajan al lieu, uschia l'autoritad civila.
Da sentir fin a Bali
Il terratrembel è stà da sentir fin sin l'insla vischina Bali. Qua hajan blers turists bandunà lur hotel tut a la bahuta e sajan sa rendids en segirezza.
L'Indonesia sa chatta sin l'uschè numnà rintg dal Pazific nua che plattas tectonicas fruntan ina sin l'autra. Perquai datti qua ordvart blers terratrembels.
Pir il schaner eran pliras persunas vegnidas blessadas tar in terratrembel da 6,0 sin l'insla Java.
Nagins Svizzer tranter las unfrendas
Tenor il Departament federal d’affars exteriurs EDA na sajan nagins Svizzers tranter las unfrendas. L’Indonesia è ina da las zonas geologicas las pli activas dal mund.
RR novitads 06:00