Almain 20 morts tar attatga da suicidi en Somalia

Tar in’attatga da terror sin in hotel en la chapitala somaliana Mogadischu èn almain mortas 20 persunas. Ulteriuras 60 persunas sajan vegnidas blessadas, communitgescha la polizia. L’organisaziun islamistica Al-Shabaab è sa declerada responsabla per l’act terroristic.

Vracs d'autos brischonts davant il hotel. Avrir maletg en lightbox.

Legenda da maletgs: Vracs d'autos davant il hotel. L'attatga è succedida sin l'hotel Ambassador en il center da Mogadischu. Keystone

Almain 20 persunas èn mortas d'in'attatga da suicidi en la chapitala da la Somalia Mogadischu.

Bumba d'auto ed ostagis en hotel

L'attentader saja charrà cun ses auto emplenì cun material explosiv en l'hotel Ambassador, ha ditg in policist. Silsuenter hajan trais umens armads assaglì il bajetg e prendì ostagis. Tranter ils morts duain era sa chattar dus deputads da la Somalia sco er dus dals terrorists. L’hotel sa chatta en il center da la citad en ina via cun blers ulteriurs hotels, restaurants e bancas.

Milissa extremistica vul eriger stadi da dieu

Sa declerada responsabla per l'attatga è l'organisaziun islamista Al-Shabaab, in’organisaziun che stat datiers ad Al-Kaida. Al-Shabaab commetta adina puspè attentats sin represchentants d’instituziuns politicas e sin persunal da segirezza. La milissa cumbatta en la Somalia dapi onns cun violenza e vul eriger in stadi da dieu islamic.

Il militar american aveva attatgà il venderdi passà in schef dad Al-Shabaab ord l'aria. Schebain el è mort na san ins anc betg.

RR novitads 06:00