- Tar in'attatga armada sin duas moscheas en la citad Christchurch èn almain 49 persunas vegnidas mazzadas.
- La primministra Jacinda Ardern valitescha l'attatga sco act terroristic.
- Trais umens ed ina dunna èn vegnids arrestads. I vala il pli aut stgalim d'alarm en il pajais.
Tar in'attatga armada sin duas moscheas en la citad da Christchurch en la Nova Zelanda èn almain 49 persunas vegnidas mazzadas. Plinavant sajan passa 40 persunas vegnidas blessadas grevamain. Quai ha confermà la primministra da la Nova Zelanda, Jacinda Ardern. I sa tractia dad in'attatga terroristica che saja vegnida planisada minuziusamain. Ardern ha proclamà il pli aut stgalim d'alarm per il pajais. Ella ha condemnà la violenza cun vehemenza.
Situaziun nunsurvesaivla
Tenor rapports da perditgas haja l'emprim in um sajettà enturn en la moschea Jasjid-al-Noor en il center da la citad, nua che passa 300 muslims eran sa rimnads da mezdi per l'uraziun dal venderdi. Silsuenter haja era in sajettim en ina moschea a Linwood en aglomeraziun da Christchurch. L'andament exact da las attatgas n'è fin uss betg cler.
Polizia arrestescha quatter suspectus
Sco la polizia ha communitgà sajan quatter persunas suspectadas vegnidas arrestadas. I sa tractia da trais umens ed ina dunna. Nagina da quellas persunas na saja sin ina glista da terror. In um saja vegnì accusà pervi da mazzament. Pliras armas sajan vegnidas chattadas, ha communitgà la polizia.
Condolenzas da l'exteriur
Indizis che Svizras u Svizzers èn tranter las unfrendas na datti il mument betg. Quai ha confermà il Departament d'affars exteriurs EDA confermà. La presidenta dal Cussegl naziunal Marina Carobbio (PS/TI) ed il president dal Cussegl dals chantuns Jean-René Fournier (PCD/VS) han exprimì lur condolaziuns a las unfrendas ed a l'entira Nova Zelanda.
Divers schefs da stadi e da regenza han condemnà l'attatga terroristica e condolà – tranter quels er il president russ Wladimir Putin e la primministra da la Gronda Britannia Theresa May
Be paucs muslims en il pajais
En la Nova Zelanda viva be ina minoritad muslima, radund 50'000 persunas. Bleras da quellas persunas derivan dal Pakistan u dal Bangladesch.
La citad da Christchurch ha 350'000 abitants e sa chatta sin l'insla dal sid dal stadi insular. La citad ha serrà tut ils bajetgs publics ed appellà als abitants da betg bandunar lur chasas perquai ch'i existia anc adina in privel.
RR novitads 06:00++