Siglir tar il cuntegn

Exteriur Amoc a Minca: La Germania en malencurada

La chancerliera tudestga Angela Merkel ha exprimì la cumpassiun cun ils plitiers da las unfrendas da l'attatga a Minca da venderdi saira. Er il minister da l'intern Thomas de Mazière emprova da calmar.

Legenda: Guardar il video «cumpassiun, però era protecziun da la libertad». Durada 1:50 minutas.
Dals 23.07.2016.

Sper ils pleds da consolaziun exprima la chanceliera tudestga era l'engraziaivladad vers la glieud da Minca ch'è sa gidada cun dar suttetg a persunas che na pudevan betg a chasa pervi da l'attatga d'amoc da venderdi. Plinavant attestescha ella a polizia e las unitads d'agid a Minca d'avair agì da moda fitg professiunala.

Wir teilen Ihren Schmerz. Wir denken an Sie. Wir leiden mit Ihnen.
Autur: Angela MerkelChanceliera federala da la Germania

Minca emprova da chapir il nunchapibel

La populaziun da Minca cumenza a realisar, tge ch'è capità. La malencurada per las unfrendas è gronda. Blera glieud metta fluras u chandailas en lieus datiers dal center da cumpra. En gruppas stettian blers ensemen per chapir quai che saja capità, rapportan las agenturas al lieu.

Minister vul calmar

Suenter l’amoc en la Germania appellescha il minister da l’intern, Thomas de Maizière a la populaziun da restar ruassaivla. El chapeschia che la glieud saja preoccupada ed agitada pervi dals schabetgs da Nizza, Würzburg e Minca. I saja fitg impurtant da sclerir mintga cas singul e dad eruir ils motivs per silsuenter pudair trair las dretgas consequenzas.

Tur d'Eiffel glischa per unfrendas

Per commemorar las unfrendas da Minca ha la Tur d'Eiffel a Paris glischà en las colurs naziunalas da la Germania, numnadamain en nair, cotschen ed aur. La metropola franzosa aveva annunzià questa acziun via Twitter.

RR novitads