Siglir tar il cuntegn

Exteriur Amoc da Minca: L'attatgader ha para planisà l'attatga

Il giuven da 18 onns, ch'a fatg stersas l'attatga d'amoc a Minca, aveva preparà questa dapi la stad passada. Sumegliont a l'assassin da massa Anders Behring Breivik en Norvegia, haja era quest formulà in manifest.

3 persunas en conferenza da medias
Legenda: Da san.: Il schef da la polizia bavaresa Robert Heimberger, il procuratur public suprem Thomas Steinkraus-Koch ed il vice-president da la polizia Werner Feiler tar l'infurmaziun. Keystone

Tenor il schef da la polizia da la Baviera Robert Heimberger n'haja il scolar tudestg-iranais però betg tschernì sias unfrendas sapientivamain. Motivaziun politica sclauda la polizia però, hai gì num a la conferenza da medias da polizia e procura publica bavaresa. Quai ils emprims resultats da las investigaziuns davart l'attatga d'amoc d'in giuven da 18 onns a Minca da venderdi passà.

I dat in discurs digital en il 'Darknet' che lascha concluder ch'el ha survegnì si'arma via 'Darknet'.
Autur: Robert HeimbergerSchef polizia Bavaria

Tar l'attatga haja il delinquent sajettà almain 57 giadas e mazzà uschia 9 persunas e blessà 35 ulteriuras persunas. 10 da questas eran però sa blessadas tar ina panica sin la fuigia. La procura publica quinta ch'il scolar haja cumprà la pistola en ina part anonima da l'internet, l'uschènumnà 'darknet'.

Malsogna psichica

Cun perquirir l'abitaziun ha chattà la polizia documentaziuns da tractament tar ina malsogna psichica dal delinquent; ed ils medicaments latiers. Il scolar saja stà en tractament staziunar durant 2 mais ed haja patì d'ina uschènumnada 'fobia sociala' e depressiuns.

Agen manifest

Polizia e procura publica bavaresa han curregì la desinfurmaziun d'avair chattà il manifest da Breivik sin il computer dal scolar. Chattà haja la polizia cumprovas ch'el haja retschertgà e saja s'infurmà davart l'attatga da Breivik. Il scolar haja sez formulà ina sort da 'manifest'.

Cumissiun speziala

Davart la motivaziun dal delinquent na sa la polizia anc nagut. Era betg, pertge ch'el haja tschernì il center da cumpra e la filiala d'ina chadaina per imbiss sperts per sias attatgas. Quai ed ulteriurs puncts ha la cumissiun speziala cun 70 persunas da sclerir.

RR novitads 15:00