Amoc en ina baselgia en il Texas – 26 morts

In um ha sajettà enturn en ina baselgia da baptists a Sutherland Springs e mazzà pliras persunas. L'attatgader da 26 onns è mort.

Policists davant baselgia. Bild in Lightbox öffnen.

Legenda da maletgs: La polizia davant la baselgia da Sutherland Springs TX. Keystone

  • En ina baselgia da baptists ha in um mazzà 26 persunas e blessà 20 ulteriuras.
  • Tenor medias localas è l'um da 26 onns entrà en baselgia ed ha sajettà enturn cun in'arma automatica.
  • I sa tractia dad in anteriur commember da l'aviatica militara ch'era prechastià.
  • L'attentader sez è mort. Betg cler è sche la polizia ha sajettà giu el u sch'el ha fatg suicidi en ses auto.
  • President Trump defenda il possess d'armas.

Be paucas emnas suenter l'amoc a Las Vegas (Nevada) ha in um sajettà enturn en ina baselgia da baptists en la vischnanca da Sutherland Springs en il stadi federativ da Texas. Las 26 unfrendas sajan tranter 5 e 72 veglias, ha ditg il guvernatur texan Greg Abbott. I sa tractia dad ina da las pli grevas attatgas en l'istorgia dal Texas.

Sco quai che l'emettur CNN rapporta, haja la polizia sajettà giu l'um en fugia. Quai haja communitgà il scherif local. Pli tard ha la polizia constatà che l'um ha eventualmain fatg suicidi en ses auto. En l'auto hajan ins para chattà dapli armas.

FBI ed Air Force investigheschan

Davart ses motiv na datti il mument naginas indicaziuns uffizialas. La polizia federala FBI investighescha en chaussa. Sche l’um dastgava insumma posseder armas, n’è anc betg enconuschent. L’aviatica militara dals Stadis Unids examinescha sche quai haja dà sbagls tar la surdada d’infurmaziuns necessarias a las autoritads localas. L'attentader era numnadamain in anteriur commember da l'aviatica militara ch'era prechastià pervi da violenza a chasa.

President Donald Trump defenda possess d'armas

Il president dals Stadis Unids Donald Trump ha condemnà l’attatga en il Texas. Tuttina ha il president defendì il possess dad armas en ils Stadis Unids. Il problem en quest cas concret na sajan betg stadas las armas, mabain in disturbi psichic da l’um ch’haja sajettà enturn en ina baselgia e mazzà 26 persunas, ha supponì Trump ad ina conferenza da medias durant sia visita en il Giapun.


RR novitads 22:00+