Siglir tar il cuntegn

Header

cuntegn

Exteriur Anc 10 dis: Avant l'elecziun en GB van May e Corbyn en posiziun

Radund in’emna avant las elecziuns parlamentaras en la Gronda Britannia èn ils dus topcandidats dals conservativs e da la partida Labour, la primministra Theresa May ed il schef da l'opposiziun Jeremy Corbyn, sa preschentads en intervistas separadas en televisiun. In duel n'hai betg dà.

In stil da manar ferm tar ils Tories e giustia sociala tar Labour: Uschia pudessan vegnir resumadas las duas posiziuns, ch’èn resultadas da las duas intervistas da televisiun cun la primministra Theresa May ed il schef da l'opposiziun Jeremy Corbyn. Radund in’emna avant las elecziuns han ils dus schefs da las pli grondas partidas sa posiziunads.

May cun il moderatur en in setting da televisiun.
Legenda: La primministra Theresa May ( a san.) en l'intervista dal glindesdi saira. Keystone

May, la meglra per trair tras il Brexit

La primministra Theresa May ha sa preschentà en in’emissiun mussada da Channel 4 e Sky News sco la meglra per manar la Gronda Britannia or da l’Uniun Europeica. Cun ella na vegnia betg a dar ina cunvegna «per mintga pretsch» en las tractativas da Brexit. Impurtant saja da survegnir la controlla da l’immigraziun.

Corbyn, quel cun l'egl per la politica interna

Corbyn ed in moderatur en in setting da televisiun.
Legenda: Jeremy Corbyn ( a san.) en l'intervista dal glindesdi saira. Keystone

Il schef da l'opposiziun Jeremy Corbyn perencunter ha accentuada la politica interna cun investiziuns en la furmaziun, l’educaziun, il sistem da sanadad e la polizia. Suenter l’attentat da Manchester da l’emna passada ha Corbyn intunà quant impurtant ch’in midament en la politica da l’exteriur dal pajais saja.

Las elecziuns parlamentaras als 8 da zercladur

Ils 8 da zercladur elegia la gronda Britannia ses nov parlament. En avrigl era la primministra Theresa May s’expressa per eleger in nov parlament en Gronda Britannia. In di suenter ha la chombra dals deputads dat ses consentiment.

May vuleva rinforzar tras las elecziuns sia posiziun sco primministra. Sche quai la gartegia n’è tenor observaturs betg uschia clar sco anc al cumenzament dal cumbat electoral.

RR novitads 07:00

Artitgels legids il pli savens