Exteriur - Anc nagina decisiun davart ina quota da fugitivs
Ils stadis da l'UE han spustà la decisiun davart co reparter ils 40'000 fugitivs da l'Italia e la Grezia. Ils ministers da l'intern dals pajais da l'UE n'han betg pudì sa cunvegnir sin ina quota. La cumissiun da l'UE aveva proponì quotas per reparter meglier ils fugitivs sin ils pajais.
I vegn spetgà ch'ils schefs da regenza dals stadis da l'UE decidian l'emna che vegn schebain las quotas duain esser obligatoricas ubain facultativas. Pir suenter vul er la Svizra examinar schebain e co ella vul sa participar al sistem, ha ditg la cussegliera federala Simonetta Sommaruga.
