Siglir tar il cuntegn

Exteriur Anc nagina schliaziun per ils debits ucranais tar la Russia

L'Ucraina e la Russia n'han anc betg chattà in consens en la dumonda da debits. Ils debits ucranais muntan a radund 3 milliardas dollars.

foto natalia jaresko che guarda preoccupada
Legenda: Temps plain tensiun per la ministra da finanzas ucranaisa Natalia Jaresko - la crisa da liquiditad n'è anc betg schliada. Reuters

Novs discurs tranter ils 2 pajais davart ina restructuraziun dals debits ucranais n'han manà a nagin resultat. Il dialog cuntinueschia dentant, ha il minister da finanzas russ Anton Siluanow ditg suenter ils discurs cun sia collega d'uffizi da l'Ucraina Natalia Jaresko; quai a l'ur da la dieta annuala dal fondo monetar internaziunal IWF e la banca mundiala a Lima.

La Russia pretenda vinavant che l'Ucraina paja ad uras ils debits. Ils debits ucranais envers la Russia scadan il december che vegn. L'avust era l'Ucraina sa cunvegnida cun ses crediturs da far in tagl dals debits per surmuntar ina largia da finanziaziun aifer in pachet da salvament dal IWF. In pachet da 40 milliardas dollars.

RR novitads 10:00