La Svizra ha serrà temporarmain sias represchentanzas en la Tirchia per la publicitad. La raschun è – tenor il Departament federal d’affars exteriurs – infurmaziuns concretas sur in'attatga terroristica. L'EDA ha confermà in rapport correspundent da la gasetta online «Blick.ch». Tant l'ambassada svizra ad Ankara sco er il consulat general ad Istanbul sajan temporarmain vegnids serrads per motivs da segirezza. Er auters stadis, sco per exempel la Germania, la Svezia e la Gronda Britannia hajan serrà lur represchentanzas localas.
Suenter differents schabetgs
Suenter plirs schabetgs en chapitalas europeicas, sco per exempel in Coran ch'è vegnì brischà publicamain a Stockholm, saja il risico per attatgas terroristicas ad Istanbul creschì, tenor valitaziun da las autoritads da segirezza, sco il ministeri da l'exteriur tudestg communitgescha. La Germania, Svezia, Norvegia, il Danemarc ed ils Stadis Unids da l'America avevan gia avertì avant in'emna d'in risico pli aut per attatgas en la Tirchia.
