Siglir tar il cuntegn
Inhalt

Exteriur Appel ad optimissem ed armonia – Trump davant il congress

En ses emprim pled davant il congress ha il president dals Stadis Unids, Donald Trump, sa mussà conciliant.

Trump al pult.
Legenda: Donald Trump en ses discurs davant il congress dals Stadis Unids. Keystone

Trump ha appellà a democrats e republicans en il congress, da collavurar. En ses emprim pled davant il congress ha il president dals Stadis Unids, Donald Trump, appellà il pajas ad optimissem, solidaritad e speranza. Il temp da cumbats banals saja a fin.

El ha intunà, ch’ils Stadis Unids veglian pasch dapertut là, nua che pasch saja pussaivla. Per quella finamira sajan ils stadis Unids er pronts, da chattar novs partenaris.

En ses discurs è/ha Donald Trump...

  • ... s’exprimì cleramain a favur da la Nato. El ha dentant repetì la pretaisa, che tut ils commembers da l’uniun militara duajan pajar lur contribuziuns.
  • ... annunzià ina «refurma da taglias istorica». Empraisas americanas duajan pajar en avegnir pli paucas taglias per pudair esser ablas da concurrer e da prosperar. Al medem mument duai la classa media dals americans pudair profitar da reducziuns da taglias. Co ch’el vul realisar quellas finamiras n’ha Trump dentant betg menziunà.
  • ... accumpagnà da l’applaus dals deputads republicans confermà ch’el vegli construir il mir tranter ils Stadis Unids e Mexico.
  • ... dumandà il congress da sustegnair ses plans da remplazzar «Obamacare». Per ina meglra prevenziun sanitara stoppia l’access vegnir schlargià, las pussaivladads d’eleger vegnir augmentadas ed ils custs vegnir reducids. Co ch'el vul dentant realisar tut quels puncts, n’ha Trump betg tradì.
  • ... annunzià da vulair collavurar en il cumbat cunter la milissa terroristica «Stadi Islamic» cun ils alliads arabs. L’entschatta da l’emna ha il minister da defensiun, James Mattis, preschentà al president in plan per cumbatter la milissa. Ils detagls n’èn betg enconuschents. En il cumbat electoral aveva Trump empermess da destruir cumplettamain la milissa da terror.