Tenor la chanceliera tudestga hajan ils blers dals fugitivs giu da sbatter cun situaziuns da tema che nus europeans n’avessan betg pudì surmuntar. Per fugitivs vala il dretg d’asil e persunas che saja agressivas cunter fugitivs na vegnan betg toleradas. Il dumber da persunas che vulan gidar saja dentant anc adina pli gronds, ha ditg Merkel.
Schulz vul reparter fugitivs pli gist
Il president dal parlament europeic, Martin Schulz ha plinavant pretendì ina repartiziun pli gista dals fugitivs sin ils stadis da l’Uniun europeica. Il mument vegnian 90% dals fugitivs recepì da sulet 9 da 28 commembers da l'UE, ha ditg Schulz en in’intervista. Quai na saja betg acceptabel.
La crisa dals fugitivs sajan in problem global che na possia betg vegnir schlià naziunal, ha accentuà Schulz. Per ils 14 da settember ha l’UE annunzia in inscunter extraordinari sur da la problematica da fugitivs.
Fugitivs arrivan cun il tren
E millis da fugitivs arrivan il mument davent da Budapest en il vest da l’Europa. Quai suenter che la polizia ha bandunà oz da mezdi la staziun en la chapitala da l’Ungaria. Blers fugitivs èn sinaquai ids en ils trens en direcziun da l’Austria, da la Germania e da la Svizra.
Enfin là aveva la polizia impedì ils fugitivs da bandunar il pajais cun il tren. Tenor indicaziuns da la polizia aveva ella tegnì si radund 6’000 fugitivs ch’eran vegnids sur la Serbia en l’Ungaria.
Tren da fugitivs cuntanscha la Svizra
In dals trens ch’ils fugitivs han prendì, è era charrà vers la Svizra. La guardia da cunfin svizra ha tegnì si ils fugitivs ed ha surdà els a la polizia chantunala da Son Gagl. Migraziun da l'ost vers il vest en trens internaziunals dettia quai gia dapi onns, ha ditg la polizia chantunala songagliaisa. Dapi il zercladur da quest onn saja quella dentant s'augmentada marcantamain.
Ed er ils vischins austriacs han franà als cunfins oz in tren vegnind da Budapest. Policists austriacs hajan controllà ils bun 150 fugitivs en il tren. Persunas che han dumandà asil en l’Ungaria na dastgian betg entrar en l’Austria, hai gì num da la polizia. Tut las persunas èn vegnida manadas cun in tren regiunal a Vienna. Sche ellas vulan dumandar asil en l’Austria vegnan ellas repartidas sin ils centers da fugitivs.
RR novitads 14:00/17:00/18:00