Siglir tar il cuntegn
Inhalt

Exteriur Arabia Saudita conferma mort da Jamal Khashoggi

La regenza da l'Arabia Saudita ha confermà ch'il schurnalist Jamal Khashoggi è mort. El saja vegnì mazzà durant in cumbat en il consulat saudiarab ad Istanbul en Tirchia, rapporta l'agentura da novitads saudiaraba Spa.

Jamal Khashoggi al telefonin.
Legenda: Suenter duas emnas ha l'Arabia Saudia confermà la mort da Jamal Khashoggi. I dat gia culpaivels ma era blers dubis. Keystone

Curt avant la conferma da l'Arabia Saudita ch'il schurnalist Jamal Khashoggi saja mort, hajan il president da la Tirchia ed il retg da l'Arabia Saudita telefonà in cun l'auter. Quai resulta d'in rapport statal che l'agentura da novitads Anadolu ha publitgà. Erdogan e Salman hajan discurrì il venderdi davart Khashoggi e quant impurtant ch'i saja da collavurar cumplainamain tar las investigaziuns. Il president ed il monarc hajan er barattà infurmaziuns davart ils svilup da las investigaziuns.

Durant las investigaziuns hajan ins arrestà 18 persunas, hai gì num. Nums na vegnan betg numnads. Cun sa referir sin in decret roial è dentant vegnì rapportà ch'il vicepresident dal servetsch secret saja vegnì relaschà. Era in cussegliader dal prinzi ereditar saja vegnì relaschà.

Sparì en il consulat saudiarab en la Tirchia

Avant duas emnas era Khashoggi sparì, quai suenter ch'el era stà en il consulat saudiarab en Tirchia. Khaschoggi era dapi il settember 2017 en l'exil. L'anteriur cussegliader da la regenza e blogger era fugì perquai ch'el ha gì tema da vegnir arrestà. El aveva numnadamain adina puspè crititgà la politica dal prinzi ereditar sco era las intervenziuns militaras dal reginavel en il Jemen.

Reacziuns

Il president american Donald Trump è da l'avis che las decleraziuns da l'Arabia Saudita davart la mort da Jamal Khashoggi sajan crediblas. En ina communicaziun scriva la Chas'alva che la regenza prendia per conuschientscha che las investigaziuns en il cas s'avanzian e che l'Arabia Saudita ageschia. Entant han plirs senaturs americans dubis vid las decleraziuns da l'Arabia Saudita.

Il secretari general da l'ONU, Antonio Guterres è er s'exprimì: El saja consternà da la conferma.

La Svizra reagescha cun consternaziun sin la mort dal schurnalist Jamal Kashoggi da l'Arabia Saudita. Per la terza giada vegnia in responsabel da l'ambassada a Berna clamà glindesdi proxim, scriva il Departament federal per fatgs exteriurs. La Svizra veglia ch'il pajais sclereschia las circumstanzas da la mort a moda exacta e transparenta.

RR novitads 06:00+