La Washington Post scriva che la Tirchia haja registraziuns da video e da tun che demussian ch'il schurnalist Jamal Khashoggi saja vegnì mazzà l'entschatta d'october en il consulat arab ad Istanbul. L'Arabia Saudita dementescha quai, n'è dentant maina vegnida da confermar che Khashoggi haja bandunà l'ambassada vivs.
Entant è in team d'investigaders arabs arrivà en la Tirchia.
Critica per la regenza tudestga
La regenza tudestga vegn crititgada per sia tenuta envers il svanir da Khashoggi. Annunziar da betg far dependent l'export dad armas en l'Arabia Saudita dal cas Khashoggi saja per Riad in signal ch'ins possia sa lubir tut. Quai ha in expert da la fundaziun Scienzia e politica ditg al Deutschlandfunk.
Lagarde viagia per IWF a Riadi – ma vegn a dir si'opiniun
La scheffa dal fond monetar internaziunal IWF, Christine Lagarde, vegnia ad ir a la grond conferenza d'investment a Riad. E quai malgrà ils rapports davart in eventual mazzament dal schurnalist e criticher dal reschim, Jamal Khashoggi.
«Igl èn schabegiadas chaussas sgarschaivlas» ha Lagarde ditg, «ma jau stoss far mia lavur per l'IWF». Lagarde ha dentant accentuà ch'ella vegnia a far palais si'opiniun.
RR novitads 06:00+