Cun Benno Elbs survegn l'archuvestgieu da Vaduz in administratur apostolic. Quai scriva kath.ch sin sia pagina d'internet. Wolfgang Haas è stà probabel il pli dispitaivel uvestg che Cuira ha gì insacura.
Il 1997 aveva quel bandunà Cuira ed era ì en il Principadi dal Liechtenstein, nua che Roma aveva stgaffì in nov archuvestgieu.
Uffizi plain conflicts
Wolfgang Haas vala sco persuna fitg conservativa. Dapli dretgs per dunnas e persunas laicas che pon decider: quai n'era nagut per el.
Uschia ha el per exempel proponì en ina brev averta da reglar nov la rolla tranter stadi e baselgia. Sia proposta fiss stada la fin per la baselgia populara. Il principi democratic n'aveva tenor el pers nagut en in'uvestgieu. Er decisiuns da persunal dispitaivlas hai dà sut Wolfgang Haas.
1997 in nov post, stgaffì be per el
Il december 1997 ha il papa tratg in stritg. El ha separà il Liechtenstein da l'uvestgieu da Cuira, ha creà il archuvestgieu Vaduz e mess Wolfang Haas a la testa. Er cunter questa decisiun hai dà protestas en il principadi – dentant senza consequenzas.
Er a Vaduz ha Wolfgang Haas sa tegnì vinavant vi da ses curs conservativ. Uschia ha el per exempel protestà cura ch'il Principadi ha il 2011 lubì a pèrs da la medema schlattaina da registrar lur partenadi. Suenter quella decisiun saja el sa retratg fermamain en ses archuvestgieu.
