Siglir tar il cuntegn

Header

cuntegn

Exteriur Armada da l'Egipta ha mazzà 16 rebels islamistics

Sin la peninsla dal Sinai ha l’armada da l’Egipta mazzà 16 rebels islamistics. Quatter ulteriurs sajan vegnids arrestads. Quai ha communitgà l’armada.

Ultra da quai sajan zups, deposits d’armas e vehichels da gruppas militantas vegnids destruids. Ulteriur material sco computers saja vegnì confiscà.

Tar l’acziun gronda sajan stadas da la partida l’aviatica militara, la marina ed era la polizia. L’acziun ha cumenzà il venderdi.

Suenter ina grev’attatga sin ina moschea il november cun passa 300 unfrendas, aveva il president Abdel Fatah Al-Sissi cumandà al militar da gudagnar enavos la controlla sur la regiun entaifer trais mais.

Situaziun tendida

La situaziun da segirezza sin la peninsla dal Sinai è dapi onns tendida. Escalada è la situaziun suenter il putsch da l’armada cunter il president da lez temp Mohammed Mursi l’onn 2013. Il mars datti elecziuns en l'Egipta. Al-Sissi candidescha per in'ulteriura perioda d'uffizi.

RR novitads 12:00

Artitgels legids il pli savens