Il post d'observaziun sirian rapporta ch'i na saja fin ussa betg vegnì violà la pausa da cumbat. Er medias localas annunzian ch'i regia ruaus en la citad. Ordavant eran ils Stadis Unids e la Russia, che vala sco allià da la Siria, sa cunvegnids ad ina nova pausa da cumbat. Tenor medias statalas è la pausa da cumbat da 48 uras entrada en vigur questa damaun.
Grevas attatgas l'ultim temp
Il cussegl da segirezza da l'ONU era sa cusseglià davart las situaziun en la citad. Il cordinatur, Stephen O'Brien, aveva discurrì d'ina «mazzacra». Las attatgas da las ultimas emnas tutgian tar las pli grevas dapi il cumenzament da la guerra civila.
La realisaziun da la pausa da cumbat saja ina basa impurtanta per ch'ils discurs da pasch a Genevra possian cuntinuar, han punctuà las Naziuns Unidas.
Betg cler cura che la pausa da cumbat duai cumenzar
Suenter ch’ils cumbats en la citad siriana Aleppo eran escalads han la Russia ed ils Stadis Unids contractà per pudair realisar ina pausa da cumbat per la regiun. Entant che las medias russas avevan rapportà che la pausa da cumbat haja cumenzà la notg sin gievgia da mesanotg avess quella, tenor indicaziuns dal minister da l'exteriur american, gì dad entrar en vigur gia 24 uras avant. L'armada siriana aveva dentant er discurrì d'ina pausa da cumbat davent da mesanotg, la notg sin gievgia.
La Frantscha e la Germania han fatg squitsch
Avant avevan la Germania e la Frantscha declerà ch’ina pausa da cumbat enturn la metropola Aleppo saja ina premissa per ulteriurs discurs da pasch.
RR novitads 6:00/10:00