La notg sin la mesemna ha il militar surpiglià la pussanza en il Simbabwe: Tenor il maior general Moyo saja la finamira da proceder cunter «criminals» en il ambient social dal president Robert Mugabe.
Era ils aderents da Robert èn adversaris da Grace
Uss haja il president arrest da chasa, ha il president da l'Africa dal sid Jacob Zuma fatg a savair suenter in telefonat cun Mugabe. A Mugabe ed a sia dunna Grace giaja dentant bain. Per sustegnair l'um da 93 onns en la crisa giajan il minister da la defensiun ed il minister da segirtad da l'Africa dal Sid en il Simbabwe. Els vegnian a sa conferir cun il president e cun il militar.
Cun il putsch veglia il militar para evitar che la dunna da Mugabe, Grace, vegnia a la pussanza. L'avanzament politic ed il stil da viver extravagant da Grace Mugabe vegnian refusads perfin dals aderents dal president, uschia observaders internaziunals.
L'UE è preoccupada
L'Uniun europeica UE sa mussa preoccupada. La mandataria da l'exteriur Federica Mogherini appellescha ad ina appaschentaziun paschaivla. Ella intimescha ils acturs relevants da chalar cun la confruntaziun e cumenzar cun il dialog.
RR novitads 20:00
