Siglir tar il cuntegn

Exteriur Arrestà editur da la gasetta Cumhuriyet

En Tirchia è vegnì arrestà l'editur da la gasetta opposiziunala «Cumhuriyet»Akin Atalay. Quai ha communitgà la gasetta sin sia pagina d'internet. Atalay saja vegnì arrestà sin l'eroport cura ch'el è arrivà da la Germania.

demonstraziun avant la redacziun da la gasetta tirca Cumhuriyet
Legenda: Pir l'emna passada ha la polizia arrestà 9 collavuraturs da la gasetta. Keystone

L'emna passada eran 9 schurnalists da Cumhuriyet vegnids arrestads pervi da «activitads terroristicas». Lura ha l'agentura da novitads statala Anadolu rapportà ch'i vegn tschertgà l'editur Atalay.

La procura publica tirca renfatscha a la gasetta ch'ella haja «legitimà» il putsch en ses rapports sco er d'avair fatg quai per il bun da la partida da lavurers curda scumandada PKK sco er al predicant Fetullah Gülen.

L'anteriur schefredactur da la gasetta Cumhuriyet, Can Dündar, è vegnì sentenzià il matg a tschintgs onns e diesch mais praschun. El aveva scrit in artitgel davart furniziuns d'armas dal servetsch secret tirc a la milissa terroristica Stadi Islamic. Il favrer è el vegnì liber enfin il process. Il fanadur ha Dündar bandunà la Tirchia e viva dapi lura en la Germania.

Dapi il putsch empruvà en la Tirchia agescha la regenza tirca a moda massiva cunter medias opposiziunala.

RR novitads 11:00