Siglir tar il cuntegn

Exteriur Arrestà schurnalist d’Al-Dschasira a Berlin

La polizia tudestga ha arrestà sin la plazza aviatica Berlin Tegel il schurnalist dad Al-Dschasira Ahmed Mansur.

policists cun in arrestà
Legenda: Maletg da simbol: La polizia ha arrestà l'um sin fundament d'in cumond d'arrest internaziunal da l'Egipta. Keystone

Ella haja arrestà l'um sin fundament d'in cumond d'arrest internaziunal da l'Egipta, ha communitgà la polizia. Ussa sto la procura generala tudestga a Berlin decider co vinavant.

Ina dretgira penala a Cairo aveva sentenzià Mansur l'onn passà ad in chasti da 15 onns praschun pervi da crims tar protests cunter Mubarak. Mansur ha refusà las rinfatschas. In video dad Al-Dschasira en l’internet mussa Mansur a la plazza aviatica. Da là vuleva el viagiar vinavant a la sedia principala da l’emettur a Doha (Katar).

Al-Dschasira pretenda da laschar liber Mansur

Entant pretenda l’emettur da novitads Al-Dschasira da la polizia tudestga ch'ella laschia liber ses collavuratur Ahmed Mansur. Las rinfatschas cunter il schurnalist egipzian sajan faussas, ha declerà l'emettur sin sia pagina d'internet.

RR novitads 12:00