La dumengia damaun ha ina gruppa attatgà l'entrada ed ils biros dal concern farmaceutic svizzer Novartis. Blessads hai dà nagins. Ils delinquents han bittà colur sin las fatschadas e rut las fanestras cun martels. Quai ha l'uffizier da la polizia tradì a l'agentura da novitads tudestga.
En l'internet è ina gruppa cun il num Rubikon sa declerada responsabla per la devastaziun. La gruppa renfatscha a Novartis d'esser corrupta: Ella haja influenzà medis e politichers cun daners. Medemamain renfatscha Rubikon a la giustia dal pajais da vulair zuppentar la corrupziun.
RR novitads 12:00