Ils fatgs impurtants da fin qua:
- La Grezia na paja betg la rata da 1,6 milliardas euros al IWF
- Il program d'agid da la gruppa da l'euro è scadì
- Ils minister da finanzas da l'euro vulan sa cussegliar oz davart las novas propostas d'Athen
- Il pievel grec decida ils 5. da fanadur davart il program da spargn proponì dals crediturs
La regenza greca aveva gia annunzià ordavant da betg pudair pajar la rata suenter che la gruppa da l'euro aveva refusà la sonda da prolungar il program d'agid. Consequenzas immediatas na smanatschan para betg ad Athen. Paucas uras avant ch'il termin scadia aveva il primminister grec Alexis Tsipras anc supplitgà l'IWF da prolungar quest pajament.
Nagins novs daners da Brüssel
Questa notg è er il program d'agid per la Grezia scadì, suenter ch'ils ministers da finanzas da la zona da l'euro han danovamain refusà il mardi saira la dumonda da prolungar quel.Las tractativas davart las novas propostas d'Athen duain però cuntinuar mesemna, ha ditg il schef da la gruppa da l'Euro Jeroen Dijsselbloem. Per ina prolungaziun dal program d'agid saja memia tard.
Grecs na san betg, co decider
Ina maioritad dals Grecs è cunter il referendum davart il program da spargn proponì dals crediturs. Sco quai che la nova retschertga da l'institut ProRata mussa daventa quella però adina pli pitschna.
Bain han 46% dals dumandads inditgà da vuschar dumengia proxima cunter las propostas dals crediturs. Avant che las bancas greccas èn vegnidas serradas transitoricamain muntava questa cumpart però anc a 57%.
Ier han almain 20’000 persunas demonstrà ad Athen per che la Grezia restia en la zona da l'euro.
RR novitads 06:00
