Tranter auter vul la Grezia engrevgiar pensiunaments anticipads ed auzar las taglias d'interpresas e las taglias da luxus. Plinavant vul la regenza cumbatter pli fitg la fugia da taglia e refurmar il servetsch public.
Persuenter duain ils crediturs internaziunals conceder in agid finanzial da 53,5 milliardas euros per ch'il pajais possia ademplir sias obligaziuns ils proxims onns. Sco quai che l'agentura da novitads ANA rapporta, duai parlament grec anc oz decider en chaussa.
Las propostas en detagl:
- Taglia sin plivalur: Athen vul stritgar reducziuns da la taglia sin plivalur per las inslas bainstantas e per quellas cun ils pli blers turists; quai però betg per tut sco quai ch'ils crediturs pretendan.
- Rentas: Survegnir rentas ancticipadas duai daventar pli difficil e persunas che retiran rentas duain sa participar pli fitg als custs da sanadad.
- Refurma da taglia: Las taglias sin interpresas e luxus duain vegnir augmentadas, la fugia da taglia duai vegnir cumbattida.
- Servetsch public: Er il servetsch public duai vegnir refurmà, tenor la glista da propostas.
- Privatisaziuns: Athen accepta la vendita da la cumpart statala vid il concern da telecommunicaziun OTE.
- Expensas per la defensiun: Athen vul spargnar ulteriurs 200 milliuns euros tar ils 100 miliuns ch'èn gia previs per quest onn. Ils crediturs pretendan però ina reducziun da 400 milliuns.
Inscunter extraordinari la dumengia
Fin la sonda examineschan ils crediturs internaziunals las propostas d'Athen, che vegnan silsuenter preschentadas als minister da finanzas da l'euro. La dumengia è lura l'inscunter suprem da tut ils 28 stadis da l'UE a Brüssel. Qua vegn decis sche la Grezia survegn novs credits u betg.
Glisa da las refurmas d'Athen
Athen na vul nagina drachma pli
Da la vart da l’Uniun europeica che fa cleras pretaisas sa mussa la prontadad da vegnir encunter al pajais. La dumonda formala per in nov credit da milliardas ha la regenza greca gia tschentà al fond d’agid da l’euro ESM. Il Grexit u il return tar la munaida greca drachma n’è entant nagin tema pli per la regenza greca, uschia in pledader da la partida Syriza.
Demos per l'euro
Ier saira han millis persunas demonstrà ad Athen per che la Grezia restia en la zona da l'euro. Ils participants han pretendì che la regenza d'Alexis Tsipras sa cunvegnia cun ils partenaris e crediturs, per ch'il pajais possia mantegnair l'euro sco valuta.
Clamà a las demonstraziuns avevan simpatisants ed electurs da la partida conservativa da l'opposiziun Nea Dimokratia, sco era dals socialists da la Pasok ed uniuns pro-europeicas.
RR novitads 06:00