Nagin policist fetschia pli sulet patruglia. Per raschuns da segirezza giajan tuts almain en dus, uschia il burgamester. Plinavant vegnian demonstraziuns, marschs da protest ed ulteriuras occurrenzas grondas en l'avegnir survegliadas da marcantamain dapli persunal en l'avegnir. A Boston ha la polizia engaschà dapli patruglias in via. A Washington è il capitol vegnì serrà per in mument pervi dad ina persuna suspectusa.
Jau na crai betg che quai fiss capità sch'il manischunz fiss stà in alv.
Mark Dayton il guvernatur da Minnesota nua ch'in nair era vegnì sajettà giu dad in policist en ses auto ha concedì problems da rassissem. El na craja betg che quai fissi capità sch'il manischunz fiss stà in alv, uschia il guvernatur. Tuts stoppian da tiers che questa furma da rassissem existia. La ministra da giustia americana Loretta Lynch ha appellà als Americans da sa tegnair ensemen.
Obama reagescha e scursanescha viadi en l'Europa
Il president american Barack Obama scursanescha ses viadi en l'Europa pervi da l'attatga a Dallas. El desistia da l'excursiun a Sevilla e turna gia la dumengia en ils Staids Unids per sa render a Dallas, communitgescha la Chas'alva. Obama cuntinueschia però sco planisà ses viadi da l'inscunter suprem da la NATO da Warschau a Madrid per s’inscuntrar cun la regenza spagnola.
Novas demonstraziuns cunter rassissem
En pliras citads americanas han danovamain millis da persunas protestà cunter il rassissem da la polizia. Las demonstraziuns, tranter auter a New York, Atlanta e Philadelphia èn tenor rapports da medias però per gronda part stadas paschaivlas. Las persunas han protestà cunter il mazzament da dus afroamericans entras policists a Minnesota e Louisianna da quest'emna. Tar il pli grond protest ad Atlanta han ils demonstrants pretendì giustia.
Tar l'attatga sin policists a Dallas durant in marsch a protest cunter la violenza da la polizia eran 5 policists vegnids mazzads, ulteriuras 9 persunas eran vegnidas blessadas.
RR novitads 06:00
