Enfin l'emna passada haja il bab da famiglia vivì senza crudar en egl a Wädenswil en il chantun Turitg. La gievgia passada haja l'um da 40 onns lura per l'ina attatgà ina vischina sco er serrà en sia dunna e ses uffants. Dapi lura sajan las autoritads svizras a la tschertga dal delinquent supponì, uschia la polizia chantunala da Turitg.
Malsogna psichica
Sco la polizia chantunala da Turitg ha annunzià vinavant, haja ella chattà documents che inditgeschian che l'um haja ina malsogna psichica e saja en tractament. La polizia ha er accentuà ch'i na dettia nagins indizis che l'um haja commess per radicalisaziun u raschuns ideologicas.
Investigaziuns cuntinueschan
Co l'um oriund da l'Eritrean saja lura vegnì en Germania e tge ch'el haja fatg quels dus dis tranter ils delicts en Svizra e quel a la staziun da Frankfurt n'è anc betg cler.
Er daco che l'um ha stuschà il buob dad 8 onns e sia mamma avant in tren a la staziun n'è betg cler. La polizia sclauda tochen uss dentant in motiv terroristic. Las autoritads svizras e quellas da la Germania investigheschan en chaussa.
RR novitads 17:00