Siglir tar il cuntegn

Header

cuntegn

Exteriur Attatga a Londra: «Stadi Islamic» surpiglia responsabladad

Commembers da la milissa terroristica hajan fatg l'attatga sonda. Quai pretenda la partiziun da propaganda dal «Stadi Islamic».

La milissa terroristica «Stadi Islamic» pretenda dad esser responsabla per l’attatga terroristica a Londra. Quai ha communitgà Amak, la partiziun da propaganda da la milissa, en l’internet. Sch’il scriver è vardaivel, n’è tenor experts dentant anc betg cler. Ma el saja vegnì publitgà sur ils chanals usitads ed en la furma usitada.

Ils attatgaders èn identifitgads

La polizia britannica ha identifitgà ils trais attatgaders da Londra. Ils nums vegnian publitgads uschè svelt che las investigaziuns permettian quai, ha declerà la polizia. Ussa saja impurtant d’eruir tant pli svelt, sch’ils attatgaders hajan agì sulet u sch’anc autras persunas sajan stadas involvidas. En connex cun las attatgas ha la polizia entant arrestà ulteriuras persunas.

Nova mesira da segirezza

Sco nova mesira da segirezza per ils peduns han las autoritads laschà metter si barrieras da betun sin las punts sur la Themse.

Da l’attatga sonda saira èn 7 persunas vegnidas mazzadas e radund 50 blessadas, per part grevamain. En connex cun l’attatga aveva la polizia arrestà 12 persunas, ina da quellas è entant puspè en libertad. Quai han communitgà las autoritads.

RR novitads 06:00

Artitgels legids il pli savens