Siglir tar il cuntegn
cuntegn

Exteriur Attatga a Nizza – 84 morts e numerus blessads

In camiun è charrà en ina fulla dad umans a la festa naziunala franzosa. Tranter las 84 victimas è era ina Svizra. President Hollande discurra dad «in'attatga cun caracter terroristic».

Quai ch'è confermà

  • In camiun charra cun 80 km/h tras la fulla da millis da persunas ch'èn sa radunandas sin la Promenade des Anglais a Nizza in occasiun dal fieu artifizial per la festa naziunala franzosa.
  • Almain 84 persunas vegnan mazzadas, 18 èn en stadi dad «urgenza absoluta», ina tschinquantina è blessada levamain.
  • L'attentader è vegnì sajettà da la pulizia. I sa tracta dad in um franzos (31) cun ragischs tunesianas. Colliaziuns cun organisaziuns da terror islamisticas n'èn actualmain vegnì enconuschentas naginas.
  • Il president franzos François Hollande discurra dad «in'attatga cun caracter terroristic». La regenza franzosa ha prolungà il stadi d'urgenza per trais ulteriurs mais.
  • ll Departament federal d'affars exteriurs conferma la mort dad ina Svizzra, sclerescha dentant inavant.

Tenor las infurmaziuns actualas ha il ministeri franzos da l'intern confermà entant che 84 persunas èn vegnidas mazzadas. 18 persunas blessadas èn en stadi dad «urgenza absoluta» ed ina tschinquantina saja levamaing blessada.

Il camiun alv na martgà era s'avischinà a la fulla sin la renumada Promenade des Anglais a Nizza, ha alura accelerà a moda marcanta ed è charrà viaden en la fulla da persunas ch'aveva observà il fieu artifizial da la festa naziunala franzosa dals 14 da fanadur. Il camiun saja charrà sin ina distanza da dus kilometers atras la fulla.

Sajettadas – dal manischunz da camiun e da la polizia

La polizia da Nizza conferma che quai haja dà sajettadas tranter la polizia ed il manischunz dal camiun. Il manischunz dal camiun saja vegnì sajettà giu. La polizia haja entant chattà documents en il camiun, rapporta l'agentura da novitads franzosa AFP sa referind sin la polizia. I sa tractia dals document d'in um franco-tunesian da 31 onns.

Questa bun'ura discurra il president franzos François Hollande dad «in'attatga cun caracter terroristic». Per oz avantmezdi ha Hollande clamà ils ministers responsabels ad ina sesida per la segirezza e la defensiun. Il minister da l'interiur Bernard Cazeneuve saja al lieu a Nizza. Hollande vegn spetgà en il curs dal di.

L'attatga a Nizza è capitada otg mais suenter l'attatga a Paris dals 13 da november 2015. Durant las attatgas en tschintg differents lieus a Paris eran vegnidas mazzadas 130 persunas.

Mo uras avant l'attatga, a chaschun da ses pled per la festa naziunala, aveva il president franzos François Holland annullà il stadi d'urgenza che valeva en Frantscha dapi las attatgas dal november da l'onn passà. Uss è il stadi d'urgenza vegnì prolungà per trais mais.

Il Departament federal d'affars exteriurs sclerescha actualmain sch'era Svizras u Svizzers èn vegnids per la vita a Nizza.

Il numer da telefon d'urgenza franzosa per persunas da l'exteriur:
0033 1 43 17 56 46

Il president da la citad da Nizza via twitter: